Sinorê mergê min

Nava min

pirdengiya daristanê ye

rastiyê

li dîwana derewan

serî çemandiye

çavên kor nabînin

guhên ker nabihîzin

şîlûbûna dengan

êşa

vizbûna zimanê Musa ye

di vê tariyê de

reng xwe vedişêrin

di birînên giyanê xwe de

hêviya hebûna xwe

xwedî dikim

di her birînekê de

hêviyekê

bi hêviya xwe mezin dikim

qolincên tenêtiyê

zayîna jan û jiyanê ne

şadî

li çeperên tovê jînê

xwe şa dibîne

li wir

gul dipişkivin

bilbil awazbêj in

xoşewîstên baxê dil

govendê digirin

xoşewîst dûr in

ez ji wan dûr im

ev sinorê mergê min e

çêja jînbiharê çi bû min nazanî

robarê kûr

bêdeng min û stêran

di awirên rojê de dibê

êşa çakoçê evîndar

qêrînên Ferhad

û tofana rondikan

mizgîniya keştiya Nuh in

kuştina tirsê

zingezinga zangilê Zerdeşt tînin

 

03.10.2011

Kamran Simo Hedilî

Nivîsa ku we şand admin

Nivîsa wek hev

Etîket

Bi xwe re parvebike

Şiroveyekê binivîse