Çirûska mijdirên

Dem melûla melûliyê bû

kal û pîr

naxwazin bibîr bînin

nayê bîra zarokan jî

destpêka çirûska

bi henasa lehengan bûyî birûsk

hêviyan beravêtibû

daran nediwêrî pelan biweşînin

çûk bê destûr nedifirîn

ba baweşîn nedikir

ewran

tîbûna hişkebeyaran nedidît

daristanan

keskeşîna henasê vedişartin

welatê êşê

di bêdengiya rondikên bavan de digirî

bihar stewrên bêhngenî bûn

ramanên biyanî mirin dianîn

nêrînên serserî

di gevzoka xwe jibîrkirinê de

dans dikirin

girgirên rûreş

di pêşbirka xulamtiyê de

bi hev re şer dikirin

koma heyî jî

balav dikirin

dil darbehîva gulqurufî

û

hest xewnên mijgirtî bûn

hatinên dûr

li awirên pakrewanên bênav dinêrîn

efnika tarîkora bêreng

kon li mêjî danî bû

çemê Mûnzir

di soriya Geliyê Zîlan de sor diherikî

û

derya dûr bû

keftelefta başûr

bêçaretiya kitikên çêlîk kuştî

û

bêdengiya bakur

jana dayîkên zarok windakirî bû

tarîreşê

çarşefa xwe girtibû ser holejînê

rojê xwe

di bin cilên şevê de veşartibû

tîrêjên sorzerê zêrîn

dilop dilop palîne malzaroka evînê

û

rûbar bû girava vejînê

çirûskê hêdî hêdî

daxwaza pîroz neqişand

bi keç

û

kurên zanîna xwe xemilandî

govenda pakrewaniyê gerand

deng

di malzaroka bêdengiyê de qîrand

miriyên goran rakirin

û

qêrînên wan birûsk afirand

ken

li asîmanê jînê çand

di asoyê sarvemirî de

hezkirin û hêvî hişyar kir

dilêran kefen dirand

bendiyên bendîxanan

rondikên şadiyê barandin

ramanên kelemçekirî zincîr qetandin

û

perda dîlîtiyê şewitandin

li jînwarê jînê

bi sedan siwarên cengê li hev qulibandin

tembûran

tawanbariya marê çarserî strandin

li xirabgehên xirbihan

jîngul pişkivandin

pêşengên çira hêviyê

kolanên artêşa mirinê derbaskirin

roj di paşila şevê de çirîsandin

bazên tirskuj bilind firandin

û

ajotine ser tariyê

êdî fireh in gavên hatinê

û

dengên baweriyê

dengên îro nayêne bihîstin

anîn zingezinga zengilê serkeftinê

dem melûla melûliyê bû

kal û pîr

naxwazin bibîr bînin

nayê bîra zarokan jî

destpêka çirûska

bi henasa lehengan bûyî birûsk

 

05.12.2011

Kamran Simo Hedilî

Nivîsa ku we şand admin

Nivîsa wek hev

Etîket

Bi xwe re parvebike

Şiroveyekê binivîse